கோவில் 776 - மன்னார்குடி மேலவாசல் சுப்பிரமணிய சுவாமி கோவில்

 🙏🏻🙏🏻                                                                                                                                                          தினம் ஒரு முருகன் ஆலயம்-776

வேண்டுதல்களை நிறைவேற்றும் மன்னார்குடி மேலவாசல் சுப்பிரமணிய சுவாமி கோவில்

24.7.2023 திங்கள்

அருள்மிகு சுப்பிரமணிய சுவாமி திருக்கோவில்

மேலவாசல்

மன்னார்குடி-614014

திருவாரூர் மாவட்டம்

இருப்பிடம்: மன்னார்குடி 4.2 கிமீ

செல்: 89031 52788

மூலவர்: சுப்பிரமணிய சுவாமி

தேவி: வள்ளி, தெய்வானை

உற்சவர்: முருகப்பெருமான் வள்ளி, தெய்வானை

தலமகிமை:

திருவாரூர் மாவட்டத்தில் உள்ள மன்னார்குடி நகரிலிருந்து 4.2 கிமீ தொலைவில் உள்ள மேலவாசல் பகுதியில் வேண்டுதல்களை நிறைவேற்றும் சுப்பிரமணிய சுவாமி கோவில் அமைந்துள்ளது. பிரசித்தி பெற்ற மன்னார்குடி ராஜகோபால சுவாமி திருக்கோவிலில் இருந்து அருகிலிருக்கும் (4 கிமீ) இத்திருக்கோவிலில் மூலவர் சுப்பிரமணிய சுவாமி வள்ளி, தெய்வானை சமேதராக அருளாட்சி செய்கிறார். 2023-ல் கோவில் கும்பாபிஷேகம் நடைபெற்றது சிறப்பம்சமாகும்.

இக்கோவிலில் ஆண்டு தோறும் சித்ரா பௌர்ணமி திருவிழா மிகச் சிறப்பாகக் கொண்டாடப்படுகின்றது. திருவிழாவின் போது பல வகை அபிஷேகங்கள், சிறப்பு அலங்காரம், விசேஷ தீபாராதனை தொடர்ந்து அன்னதானம் நடக்கின்றன. பங்குனி உத்திரம், தைப்பூசம், கந்த சஷ்டி, திருக்கார்த்திகை முதலான திருவிழாக்களும் வெகு விமரிசையாக நடைபெறுகின்றன. சஷ்டி, கிருத்திகை நாட்களில் விசேஷ வழிபாடுகள் நடக்கும். திருவிழா சமயங்களில் ஏராளமான பக்தர்கள் கலந்துக் கொண்டு முருகப்பெருமானை வழிபட்டு, நற்பலன்கள் பெற்று செல்கின்றனர்.

தல வரலாறு:

மிகவும் பழமையான இக்கோவில் 2022-ல் திருப்பணிகள் நடைபெற்று, புதிய பொலிவுடன் 1.2.2023-ல் கும்பாபிஷேகம் சிறப்பாக நடைபெற்றது.

தல அமைப்பு:

அழகிய சிறபங்களுடன் கூடிய இக்கோவில் ராஜகோபுரம் வழியாக நுழைந்த உடன் மயில், பலிபீடம் மூலவர் எதிரில் உள்ளன. கருவறை முகப்பின் வலப்புறம் விநாயகரும், இடப்புறம் தண்டாயுதபாணியும் வீற்றிருந்து அருளுகின்றனர். கருவறையில் மூலவராக சுப்பிரமணிய சுவாமி வேல் தாங்கி கிழக்கு நோக்கி நின்ற கோலத்தில் வள்ளி, தெய்வானையுடன் காட்சி தந்து பக்தர்களுக்கு அருள்பாலிக்கின்றார். கருவறை கோஷ்டத்தில் தட்சிணாமூர்த்தி, விஷ்ணு பகவான், பிரம்மா அருளுகின்றனர். துர்க்கை தனி சந்நிதியில் அருள்பாலிக்கின்றார். கோவிலின் வடகிழக்கில் நவக்கிரகங்கள் அருளுகின்றனர். மேலும் சனீஸ்வரர் தனியாகவும் திருக்காட்சி அருள்வது சிறப்பம்சமாகும்.

திருவிழா:

சித்ரா பவுர்ணமி, பங்குனி உத்திரம், தைப்பூசம், கந்த சஷ்டி, வைகாசி விசாகம் திருக்கார்த்திகை, சஷ்டி, கிருத்திகை

பிரார்த்தனை:

வேண்டுதல்கள் நிறைவேற, நல்லன நடக்க, குடும்ப வாழ்வு சிறக்க, செல்வம் பெருக

நேர்த்திக்கடன்:

பால்குடம், அபிஷேகம், அலங்காரம், சிறப்பு பூஜைகள், அன்னதானம்

நல்லன அருளும் மன்னார்குடி மேலவாசல் சுப்பிரமணிய சுவாமி மனமுருகி பிரார்த்திப்போம்!

வேலும் மயிலும் துணை!

திருச்சிற்றம்பலம்!

Dr K. முத்துக்குமரன் Ph. D

கோயம்புத்தூர் 25

🙏🏻🙏🏻

படம் 1 - 776 வேண்டுதல்களை நிறைவேற்றும் மன்னார்குடி மேலவாசல் சுப்பிரமணிய சுவாமி

படம் 2 - 776 நல்லன அருளும் மன்னார்குடி மேலவாசல் சுப்பிரமணிய சுவாமி